Drome wat verbrokkel voor jou oë: ‘n Onderhoud met Van Heerden Pretorius.
Interskole is ‘n drie-skool geleentheid: Hoër Meisieskool Paarl, Hoër Jongenskool Paarl en Hoërskool Paarl Gimnasium. Vir die week van Interskool is HMS en HJS een familie, susters en broers teen hul opponente in die Noorde. Interskole-week bestaan uit netbal, hokkie, skaak, rugby en nog meer wat gespeel word. By HMS loop die netbal en hokkie opwinding natuurlik oor, maar in die dorp bou die week op tot Saterdag se eerstespan wedstryd.
Ek het dus besluit om so paar vrae vir ons broerskool se eerstespan kaptein, Van Heerden Pretorius te vra.
Van Heerden is ‘n interessante man om mee te gesels en hy ervaar vanjaar ‘n soortgelyke hartseer as wat ons eerstespan hokkie kapteine, Zanke Nell, verlede jaar ervaar het. Hulle het beide in die oploop na interskole hulle kakebeen gebreek en is gevolglik die voorreg om deel te neem aan hierdie spesiale geleentheid verbeur.
1. Van Heerden, interskole lê voor en jy is die eerstespan kaptein, maar jy het jou kakebeen gebreek. So wat nou? Kan ons verwag om jou op die veld te sien?
Ja, ek het ongelukkig in die Craven-week finaal my kaak gebreek, maar sover lyk my kanse goed. Die dokter is positief so daar is darem hoop.
2. Wat het deur jou kop gegaan toe jy hoor jou kakebeen is gebreek 'n paar weke voor interskole?
Ek was natuurlik baie emosioneel, want ek het nie gedink ek het 'n kans gehad om te kan speel nie. Dis ‘n pyn wat woorde nie kan beskryf nie. Interskole is my droom. Ek het nie hard gewerk vir ‘n kontrak of so iets nie ek wou net op Faurestraat uitdraf.
3. Kom ons draai nie doekies om nie. Boishaai se laaste paar rygbywedstryde het nie juis té goed afgeloop nie. Hoe voel julle oor hierdie groot wedstryd wat voorlê ?
Die seisoen was moeilik vir ons gewees, maar alles waardeur ons was voel ek het ons gemaak tot wat ons nou is en dis ‘n span wat iets het om te bewys dié Saterdag.
4. Jy is nou in matriek. Dit is jou laaste interskole as 'n speler. Wat gaan jy doen om te verseker dat dit ekstra spesiaal is?
Gelukkig is daar niks wat ek wil doen nie, want alles wat dié week gebeur is klaar oorgenoeg en ek weet dit gaan onvergeetlik wees.
5. Watter boodskap het jy vir jou span en ondersteuners?
Aan my span wil ek net sê: Al het die jaar nie soos beplan afgeloop nie, het ons 'n laaste kans saam as 'n span om mense te inspireer en drieë te druk vir die Here. En aan die ondersteuners, dankie dat julle deur duk en dun agter ons gestaan het. Ons waardeer julle verskriklik.
6. Om af te sluit, wil jy nie 'n kans waag en die eindtelling voorspel nie?
As ek moes raai sou ek se 14-13 vir BHS.
Die storie van Van Heerden, soos ons kapteine van verlede jaar is die storie van sport en van die lewe. Dikwels werk mens so hard vir een doel en kom so naby net om dit te sien verbrokkel voor jou oë. Dit maak seer om ander te sien uithardloop op daardie veld en nie jy nie. Tog, moet mens nie moed verloor nie, want dikwels leer jy iets belangriker op daardie ondersteunersbankie wat jou nog baie gaan baat in jou toekomstige sport loopbaan.
Ons dink aan Van Heerden en HJS en hou saam duimvas dat Saterdag se wedstryd wel ‘n naelbyt geleentheid is en dat telbord sag is op ons broers in blou.
Comments
Post a Comment